Proteición preventiva del patrimoniu (cultural y natural)

Cuando l’arquiteutu Nanclares propunxo que se quitara l’altar del mirador de “Santa María del Naranco” (agora n’obres) y se volviera pa San Miguel de Lliño (que ye la ilesia de siempres de magar lo cabero’l sieglu IX), l’arzobispu Osoro remontó. Nun almiten nin eso nin muncho menos la secularización del palaciu del rei de los ástures Ramiro I, que lo llamen “Santa María” porque foi parroquia cuando la riada llevó San Miguel de Lliño, pero que debiera denomase lo que ye y foi siempres: “Palaciu del Rei Ramiro”. L’obispáu nun quier perder la tutela l’edificiu y el gobiernu pasa per ello.
Controlar el xentío nel Parque Nacional
Tamién pasó cuando inauguraben l’hotel Pelayo remodeláu y s’entamaba a falar de limitaciones d’accesu, ente xunetu y setiembre, al parque, a Cuadonga y los llagos. L’arzobispu plantegó que la cosa nun fora con Cuadonga (magar que tea dientro del Parque Nacional) y el presidente Álvarez Areces dixo que bien, qu’accesu llibre a Cuadonga.
El gobiernu central nun s’amilana porque 19 obispos se manifiesten en Madrid contra los nuevos derechos civiles que se pretenden afitar pa les y los homosexuales -y paezme que nun deben amilanase anque se manifieste la VI Flota, que tampoco replegó’l gobiernu anterior cuando más de media España se manifestaba contra la collaboración con esa VI (o la que seya) flota norteamericana na guerra d’Iraq-. Pero, esto ye Asturies, y el gobiernu asturianu demuestra talante especial, claro que namái que con dellos: les empreses llétriques, los constructores o l’obispáu, por exemplu.
Cuando en tolos parques nacionales hai limitaciones d’accesu y cuando -por fin- el gobiernu asturianu s’arremangó pa racionalizar la llocura turística braniega en los llagos y Cuadonga de la única manera posible, con aparcamientos disuasorios y tresporte público, vien la Ilesia con que non pa Cuadonga, y -claro- los empresarios hosteleros (que nun ven otro que matar la pita los güevos d’oro), que tampoco nos llagos, que nada de limitaciones. Y el gobiernu rebobina -bon talante- y diz qu’eso, qu’esti añu tampoco se controla. Que sigue’l mogollón y que namái unes selmanuques de preba n’agostu y tal.
La variante de Muñigu
¿Y esa variante de l’AS-265?¿Quién la quier imponer? Porque paez que los empresarios hosteleros y turísticos tamién la refuguen -ye lo único no que tamos d’alcuerdu con ellos- pero’l proyeutu tuvo esti mes a información pública. Yá falábemos d’él nesta mesma páxina (el 5 d’abril) y recordábemos que nin la Llei de Declaración del Parque Nacional nin el Plan Direutor de PP. NN., nin el Plan d’Ordenación de los Recursos Naturales de Picos d’Europa, nin el Plan Reutor d’Usu y Xestión almitíen más carreteres nel Parque Nacional de los Picos d’Europa. Claro qu’agora tán suspendíos por sentencies del Tribunal Supremu’l PORNPE y el PRUX, pero ye por otros detalles y non polo que dicíen de les infraestructures: cualesquier documentu de planificación va tener que dicir daqué asemeyáu, y bien podíen facer una suspensión cautelar del proyeutu de Muñigu mentanto falten esos planes, como se suspenden les llicencies municipales cuando se ta redactando un plan urbanísticu.
Pero conservar el patrimoniu natural y cultural nun ye prioritariu . La prioridá ye construir (infraestructures y lo que seya, faiga falta o non: lo que paez que sobren son perres pa eso).
Edificar enriba les ruines
Tamién agora quieren edificar lo que queda llibre na cai Santana d’Uviéu, nel solar onde se ven güei mesmo basamentos de vieyes edificaciones; no único que nun edificaren entá del obispáu (bona parte del xacimientu de lo que foron edificios al sur del palaciu d’Alfonsu II, el fundador d’Uviéu, ye lo qu’ocupa agora’l palaciu episcopal).
Paeznos qu’igual ye meyor dexar eses ruines, esos vieyos restos de la ciudá a la vista (¿cómo asegurar que nun seya tamién de cuando Alfonsu II?). Sabemos qu’otros eruditos y de xuro meyor conocedores de la hestoria d’Uviéu consideren meyor que s’edifique lo que tuvo munchos sieglos ocupao, que se caltengan cais estreches y non abrir places onde tuvo siempre edificao. Pero agora nun lo ta y ye momentu de decidir con procuru lo meyor. En Cultura tán pendientes de llegar a alcuerdos col Arzobispáu…
La Conseyería tien la obligación de preservar los xacimientos arqueolóxicos ya igual nun debía almitir otru alcuerdu que nun seya dexar llibres y acuriosar restos del complexu palatín alfonsín o d’otres époques de la ciudá. Non lo primero que-y propongan. Porque con otres iniciatives nun hai talante que valga: namái se refuguen propuestes de conservación, preventives o de caltenimientu y de que nun se faigan coses innecesaries y agresives.
La ilesia de Santuyano
Como en Santuyano, tamién n’Uviéu, que PP ya IX paecen d’alcuerdu en llantar una llábana de formigón y soterrar l’autovía A-66, y tampoco la Conseyería de Cultura (nin l’Obispáu) se pronuncien -que sepamos- en contra. La solución, nesti casu, tampoco ye afondar l’autovía calteniéndola a los menos de seis metros que ta d’una ilesia, precisamente la ilesia palatina d’Alfonsu II, la más antigua d’Europa con ritu ininterrumpíu de magar se fundó, ente l’añu 812 y el 842. La solución ye alloñar la carretera del monumentu (¡patrimoniu de la humanidá!), correla unos metros pa escontra la fábrica d’armes, y non más cemento y más obra cuando les soluciones son meyores y más barates.
Pero ye lo que dicíemos: cuanto más obra y más derroche, meyor, ¡será por perres! (les perres que vienen d’Europa, claro). Agora que van dexar de venir ye bon momentu pa pensar cuántes de les obres son innecesaries y perxudiciales pal patrimoniu asturianu.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s